Манас шаардык депутаттар кеңеши

Бүгүн, 25-июнда Манас шаарынын мэриясынын жыйындар залында 2025–2026-окуу жылында “Алтын сертификат” алган бүтүрүүчүлөрдү куттуктоо аземи болуп өттү. Иш-чарада Манас шаардык кеңешинин депутаты Уларкан Бекешова бүтүрүүчүлөрдү куттуктады.

Сыйлоо аземине Манас шаарынын мэри Уларбек Исмаилов, шаардык билим берүү бөлүмүнүн башчысы Миндирман Элеманов, мектеп директорлору жана бүтүрүүчүлөрдүн ата-энелери катышты.

Депутат куттуктоо сөзүндө ийгилик жараткан окуучуларга кайрылып, Манас шаарынын билим деңгээлин республикага тааныткан бүтүрүүчүлөргө бекем ден соолук, кең келечек жана мындан аркы ийгиликтерди каалады.

Сыйлоо аземинин жүрүшүндө ийгилик жараткан окуучуларга Манас шаарынын мэриясынын Ардак грамоталары жана акчалай сыйлыктар тапшырылды. Мындан тышкары, окуучулардын ата-энелерине, мугалимдерге Манас шаарынын ыраазычылык баракчалары ыйгарылып, акчалай сыйлыкка ээ болушту.

Белгилей кетсек, Манас шаарында быйыл 1767 окуучу 11-классты аяктап, алардын ичинен 3 окуучу “Алтын сертификатка” ээ болсо, дагы бир окуучу жогорку балл көрсөткөн.